1Cor 10 | WSK | STEP | Aga singsang, ani nina mel imi ko ninguru ikialko. Girakala ana Juda alo nanga taleng girigir Moses arungu namawakaso. Se Kaem taiti nuwi bo beteram se lage nunga kasurukaso ale arungu namakaso, se nuna suen la bowa ningi aolak ilukasan. Ale suen la aolak iluman Gagi Diriyam batagorman koma saki te kasu kapaman.

1 Corinthians 10

Ana te ikinakko Kaem Israel alo nunga dugu duap nanga kausam

1 Aga singsang, ani nina mel imi ko ninguru ikialko. Girakala ana Juda alo nanga taleng girigir Moses arungu namawakaso. Se Kaem taiti nuwi bo beteram se lage nunga kasurukaso ale arungu namakaso, se nuna suen la bowa ningi aolak ilukasan. Ale suen la aolak iluman Gagi Diriyam batagorman koma saki te kasu kapaman. 2 Nuna suen la taiti nuwi te, se gagi te anuwa taman iwitata. Se anuwa mu te nuna Moses nunga kari biya ko balman ale kowom karokasan. ^{▼▼1 Cor 10:1-2 Israel alo aolak ilukasan: Exodus 13:21; 14:22-29.} 3 Nuna suen la duruk wonong ko na inang taikaso mu nokasan. 4 Ale yu ningo manga ningi tai aratukaso mu nokasan. Umutang mu Kristus kota arungak aolak ilu se, na yu nungaru se, nunga sangaruwakaso. ^{▼▼1 Cor 10:3-4 Kari Biya na yu nungarukaso: Exo 16:35; 17:6. John 4:14; 6:35; 7:37-38 ago arikko.} 5 Bare nunga ningi kariimet suen biya tala nunga betera kaora memek ko Kaem me nunga kuakaso. Se nuna sor garagarayam mu te aolak ilu namawa se kuakasan. ^{▼▼1 Cor 10:5 Israel alo sor garagarayam mu te kuakasan: Numbers 14:29; Heb 3:17; Jude 5.}

6 Mel suen la imi aratukaso mu ana te ikinak ale nuna bitakasan iwitata kilek memek memek mu ko me nangamang barasuk se me betenakko. 7 Nunga ningi saki kaem kawel nunup patawukasan iwita, nina kaem kawel nunup me patowaralko. Kaem ko batoga te iwita aniso, “Nuna dagikasan ale na yu nokasan, asele barasukasan ale amilmil kelagakasan.” ^{▼▼1 Cor 10:6-10 Israel alo nunga munan: Num 11:4,34; Exo 32:6; Num 25:5-6; Num 16:41-49.} 8 Ana kariimet nainimi karogo anira barasa kilek me betenakko. Nunga ningi saki butata beteman, se Kaem balam se worem suwanta te 23,000 kua gilingiman. 9 Ale ana Kristus gomang ikup tua ko bala guruga duap duap me balnakko. Nunga ningi saki butata beteman, se borta ko Kaem balam se ma urer barasaman ale nunga usikasan se kuakasan. 10 Nina me iningiral munakaralko. Nunga ningi saki uwutata beteman, se Kaem ko engel kariimet mora ko mu maonam se tairam ale nunga moram se kueman.

11 Mel suen la nuna nungumik te aratam mu kausa iwita. Ana tom te bagasan imi mu tom nukum pingita. Se ana te ikinak ale ninguru sinar tanakko mel imi ko dugu duap Kaem ko batoga te batagorman se aniso.

12 Buta se, nina awiriya ninimi ikisan nina sokel ago sanamiwasan, mu sinar talko! Nengeta dagulal bore ko! 13 Ira ariga nina nengete aratukaso, mu nenenga te la mena. Mu ira ariga koma suwanta tala kariimet suen la nongote aratoso. Bare Kaem mu me nanga beteso. Se ana noko la nangamang ningi nunguning arukko. Nu sinar ago bagoso. Se ira ariga bo nina te sanamaralko me terong mu nengete me aratukko. Ira ariga bo nengete aratuk, mu nu sokel ningaruk se te gek am sanamaralko.

Kris alo mu kaem kawel ko tama bita tua mu ko duap te me nama biguwumonko

14 Buta se aga singsang yawara, kaem kawel nibiring tualko! 15 Nina ngualara mena, nina ikia ago, se den ani balsam imi mu nengeta tuteral ale ko ikialko. 16 Ana biguwusan ale yu waen Kristus ko gue ko balso mu ko Kaem amilmil tusan ale nasan, mu ko nunguning iwita: ana nanga saki arungu biguwuman ale Kristus ilak wete bagasan. Ale inang Kristus ko kumik guang ko balso mu pagorsan ale nasan, mu betela ko nunguning mu ana nanga saki arungu biguwuman ale Kristus ilak wete bagasan. 17 Mu inang suwanta. Se ana suen biya bare inang suwanta mu nainimi tusan nasan ale te motam suwanta bagasan. 18 Nina Israel alo nunga ikialko: nuna inang mel Kaem te tama tusan mu nasan, umutang te nuna ko nup te motam suwanta bagasan.

19 Se na inang kaem kawel te tama tusan mu mel nunguning, se kaem kawel mu mel nunguning ma iwita balsam e? 20 Mena! Bare ani iwita balsam, kariimet Kaem ko me ikia alo na inang kaem kawel te tama bita nungarsan, mu nuna bur memek tama nungarsan. Mu nuna Kaem tama me tusan. Se ani nina bur memek mu arungu biguwuralko me kuesam. 21 Nina Kari Biya ko yu inang nal, ale akingtala bur memek nunga yu inang me nalko! ^{▼▼1 Cor 10:19-21 Kaem kawel se bur memek: Deut 32:17; 1 Cor 8:4; 2 Cor 6:16-17; Rev 9:20.} 22 Nina Kari Biya gomang me maguwuralko! Agi nenenga nesokel pa noko sokel kiaram e?

Kris alo mu munan nunga saki alo nunga sangukko mu la betemonko

23 Nina saki balsan, “Ana munan suen biya, ko kaola bo mena, am betenakko pa!” masan. Bare ani iwita ninga manorsam, munan mel saki anananga bagara aolak me sangukko. Ana munan saki betenak se nanga sikisaki nunga nongomang ningi nunguning maguwurok bore ko sinar tanak ale me betenakko. 24 Ana nangata nanga bagara aolak ko la me sinar tanakko. Mena. Ana saki nunga bagara aolak agotala ko sinar tanakko.

25 Nio-buruk diara kuwim te ago taisan mu am diaral ale nalko, mu ko den bo mena. Kaem kawel te tama beteman ale ago taiman agi mu ko ningamin yeneruk se me ko isalko. 26 Mu awuk, “Ali se mel suen biya awete mu Kari Biya ko la.”

27 Se aking kariimet bo Kaem ko me ikiso mu ilak na yu nalko ninga aurok, se nongote namaralko nengemang aniruk, mu am namaralko. Se anapeya na inang ningarmon mu am nalko, me ko ningamin yenerukko, am nalko. ^{▼▼1 Cor 10:27 Luke 10:8 ago arikko.} 28 Bare bo ninga manuk, “Na inang imi kaem kawel te tama tuman,” ma baluk, mu nina na mu me nalko. Nina nengeta mu na mu ko me ningamin yeneso. Bare ninga bo ko ikia talko. Nina na mu nal se kari mu kuamin yeneruk bore ko. Mu awuk, nu ikiso na mu me na ko iwita ikiso.

Se kariimet bo aga isok, “Ani ikisam na inang umutang naikko ikisam terong, bare aga bo na mu ko kuamin yenawoso, se mu ko ani na mu me naik i? 30 Ani aga inang ko Kaem manik ale naik, bare anape ko kari bo ko balukko ya?”

Nu uwuta baluk agi, 31 bare ani munan iwita ningarsam: nina na nowasan agi, anapeya bitawasan, bare munan suen la mu ikia ago la beteral, se Kaem nup biya taukko. 32 Nina Juda alo, Greek alo, se Kris kariimet saki alo nunga ikia tal, ale munan nuna te nongomang me namuruk tairukko mu la te arungu bagaralko. 33 Ani agotala munan kariimet ko kuemonko mu suen la betesam. Mu awuk, ani agata aimi sangikko me ago kaesam. Ani kariimet suen la nunga sangik se te Kaem nunga giokko ko munan betesam.